Kan Bishop i zaangfahnak Jubilee Kum i Thawngtha
Dawtmi Khrihfa ulenau hna, kan hnu December ni riat, sualhram ngeilo Bawinu puai ni hram thawkin hmai kum November 16,2016 Khrih Siangpahrang puai tiang kan Pope pa nih “Zaangfahnak kum” tiin vawleicung kaa kipah thawngzamhnak a tuah cang. Kannih Kawlram zongah December 13, 2015 zarhpi ni ahhin Zaangfahnak kum cu mipi tam deuh i tel khawh awkah tuah a si ve bantukin, kan Hakha diocese zongah St. Joseph Cathedral Biak innpi ah ka hnunak in hramthawk a si ve cang.
Chimkhawh lomi kan Pa Pathian zaangfahnak hi Cathiang nih fiang tein a kan chimh. Genesis chungah kan Pa Pathian i dawtnak cu a hlei in minung hna caah a rak si. Isreal miphun thim a rak sinak cu miphun ngan le mi lianngan an si ruang ah a rak si lo. Miphun hmete an si ko buin dawtu Pathian nih a miphun ah a rak auh hna. Hi zong hi a zaangfahnak a rak ngeih hna kha a si. Is. 431f---tih hlah --- na min kan auh.
Kum 40 chung thetse ram khual tlawnnak chung ah harnak phunkip tam hmanhsehlaw a veel tangah le zaangfahnak chungah a rak himter hna. Kan Bawipa Khrih cu kan Pa Pathian zaangfahnak aa phuannak bik a si. Bia cu minung ah a cang. (Jn. 1:1f) Cawnpiaknak a ngeihmi le a phuangmi thawngtha hna chungah, “Tuukhal ngeilo tuu bantuk an si,” a tinak thawngin kan cung zaangfahnak a ngeihmi cu a langhter. A tlaumi fapa kong ah siseh, Tuu pakhat a tlau, 99 kha ram lakah chiahtak in a tlaumi tuu pakhat kha a hmuh hlan tiang a kawlmi tuukhal tha i zaangfahnak hna hi kan Pathian dawtnak a nganning a langhtermi hna an si.
Hi tluk zaangfahnak a kan ngeih nain nihin kan nunnak ah, vawlei le ni le chan nih duhsah tein a kan kalpi i Satan tukforhnak chungah mitcaw kan si theu tawn. A nganmi a zaangfahnak kha kan philh hlei ah chantiluan ah kan nunnak cu, Pathian zaangfahnak kha philh in, mah pumpak duhnak, ruangkainak, mi zeirellonak hna cu thinlung chung le vawlei cung ah lainawngnak tiang a kan phakter cang.
An nganmi Pathian i zaangfahnak hi tharchuah awkah zaangfahnak Jubilee kumpi cu hramthawk a si cang. Ni fate kan nunnak ah zeitluk in dah veel a kan ngeih i, a kan zaangfah timi te hi thinlung ah chiah u silaw. Fapa tlau nih a Pa inn i zaangfah dawtnak kong kha a thinlung chungah a vun chuah tikah, “ka Pa sinah ka kir than lai,” a rak ti bang khan nihin kan tlaunak hmunhma cio in kan Pa i zaangfahnak cu ruat than u si. Zaangfahnak chung kan nunnak thawng in, nihin kan chan nih a herh bikmi, pakhat le pakhat zawnruatnak, i bawmh i hramhnak le midang ca kan ni kan can pekchanh khawhnak thlarau thazaang thar cu pek kan si lai. Cun kan pawngkam le kan vawlei ah remhdainak a um than lai.
Bishop Lucius.
